दीपावली र छठ मनाउने क्रममा पड्काइने आतेसबाजी र पटकाले वर्षेनि थुप्रैमा आँखाको दृष्टि गुम्ने, कानको जाली फुट्ने लगायतका समस्या आइपर्छन् ।
कतिपय बेला त सामान्य पटकाले समेत ज्यान समेत लिने गरेको छ । त्यसैले पटका पड्काउनै परे पनि सावधानीपूर्वक पड्काऔं । नत्र क्षणभरको रमाइलो जीवनभरका लागि पीडा नहोला भन्न सकिन्न । दीपावलीमा आनन्द उठाउनुस् तर विचार पुर्याएर । बम, पटका आतेसबाजी, फुलझडी आदि चलाउँदा विशेष ध्यान दिनुस् ।
युनिसेफका अनुसार विश्वमा वर्षेनि करिब साढे सात लाख व्यक्तिको डढेर मृत्यु हुने गरेको छ । त्यस्तो घटनाका लागि पटका मुख्य रूपमा जिम्मेवार रहेको छ ।
चिकित्सकहरूका अनुसार आतेसबाजी र पटकाले आगजनी मात्र हुँदैन बरु आँखामा चोट, आँखाको ढकनी च्यातिने, दृष्टि गुम्ने, हृदयाघात, रक्तचाप, दम, नाकको एलर्जी, ब्रोकाइटिस, निमोनिया, कानको जाली च्यातिने, टाउको दुख्ने र अनिद्रा लगायत हुन सक्छ ।
'पटकामा एउटा आवाजको प्रभाव र अर्को पड्काइ (ब्लास्ट) को प्रभाव हुन्छ,' त्रिवि शिक्षण अस्पताल, महाराजगन्जका नाक, कान र घाँटी विभागका प्रमुख प्रा.डा.राकेशप्रसाद श्रीवास्तव भन्छन्, 'तिखो आवाजका कारणले कानको भित्री नसा कमजोर हुन सक्छ भने पड्काइको प्रभावले कानको जाली पनि फुट्न सक्छ ।'
'अझ नसामा देखिने प्रभावको त कुनै उपचार समेत छैन,' प्रा.डा. श्रीवास्तव भन्छन्, 'जालीमा प्रभाव परेको छ भने कहिलेकाहीँ आफंै वा शल्यक्रिया गर्दा निको हुन सक्छ ।'
